ԵՊՀ Սահմանադրական տնտեսագիտության գիտավերլուծական կենտրոնում շարունակվում են գիտական սեմինարները: Այսօր «Նեյրոնային ցանցերի կիրառությունը օբյեկտների քլաստերացման և դասակարգման խնդիրներում» թեմայով սեմինարը վարում էր ֆակուլտետի դոցենտ Գայանե Ղուկասյանը:

Ներկայումս գիտության տարբեր ճյուղերում ծագած ամենաբարդ խնդիրների լուծման համար լայն կիրառություն են ստացել արհեստական նեյրոնային ցանցերը, որոնք ապահովում են բարդ տրամաբանական կառուցվածքների ստեղծման մեծ արագություն, գործողությունների զուգահեռ կատարում, տրամաբանական գործողությունների ալգորիթմի պարզություն, դժվար ֆորմալացվող խնդիրների լուծման հնարավորություն և այլն:

<<Արհեստական նեյրոնային ցանց>> հասկացությունը՝ որպես մաթեմատիկական ալգորիթմների բազմություն, ձևակերպվել է  Մակ-Կալոկի և Պիտսի կողմից: Ցանցի նպատակն է գլխուղեղի կենսաբանական գործընթացների ուսումնասիրումն ու  նեյրոցանցային արհեստական բանականության ստեղծումը:

Արհեստական նեյրոնային ցանցերի վրա հիմնված հաշվողական համակարգերը օժտված են մի շարք որակներով, որոնք բացակայում են Ֆոն Նեյմանի ճարտարապետությամբ մեքենաներում, այդ թվում՝ մասսայական զուգահեռականություն, ինֆորմացիայի և հաշվարկների բաշխված ներկայացում, ընդհանրացման և ուսուցման ունակություն, ինֆորմացիայի բովանդակային մշակման կարողություն և այլն:

Նեյրոնային ցանցերը հանդիսանում են ինքնաուսուցանվող համակարգեր: Ինքնաուսուցման ընթացքում, սովորելով  բավականին մեծ ծավալի տեղեկատվության վրա, ցանցն ունակ է դառնում բացահայտելու մուտքային և ելքային տվյալների միջև եղած թաքնված ամենաբարդ կախվածությունները, կատարելու ընդհանրացումներ:

Բանախոսը ներկայացրեց նաև  արհեստական նեյրոնային ցանցերի կիրառության ոլորտները.  նեյրոկառավարում, քլաստերացում, կերպարների ճանաչում ու դասակարգում, կանխատեսում, ապրոքսիմացիա և այլն: